Crostini Bakery & Cafe (已結業)

今日落雨，唯有喺商场行下，无无聊聊谂住饮杯咖啡。依家出街都一定带着随行杯，减少使用一次性塑胶。餐厅而家做紧优惠，买一杯嘢饮就送$25现金卷，下次买任何饮品可以使用。我同老公分单，即系加多$4就有第二杯咖啡，都非常之抵。讲番杯咖啡，两杯都系 skimmed milk latte，但系饮落就唔同味，用餐厅个杯装嘅𠮶杯，咖啡味浓啲，唔知系咪因为店员姐姐见我个杯大啲帮我装多咗奶。咖啡偏苦，唔算太浓郁，亦都唔太香，我坐喺咖啡机隔离，店员姐姐系隔离冲咖啡，但我都闻唔到香味。当然我唔系期望佢有Starbucks𠮶一种咁浮夸嘅香味，但咖啡豆冲出嚟𠮶下嘅香味我都闻唔到，就有啲奇怪，唔通呢到抽风做得太好？另外叫咗个 muffin, 朱古力味，甜咗啲，但佢加咗啲杏仁片落去，有啲诚意。但总括来讲，我钟意Starbucks 个 muffin 多啲。咖啡方面，我唔特别推荐，但如果佢继续做呢个优惠，而咁啱又好想饮咖啡，都一饮无妨既。呢间餐厅有四个位，方便叫咗面包或者咖啡可以坐低食下休息一下，但各位食客占用嘅时间都唔一样，唔好期待每一次都咁容易攞到位。