影片
更多
2012-05-23
2483 浏览
同机场富豪酒店真系有啲缘份，早前嚟过佢嘅艺廊咖啡室食自助晚餐，𠮶餐食咗唔少嘢，感觉几畅怀；估唔到咁快又再入嚟食多餐，不过就唔系艺廊啦，而系晌2/F嘅Regala Café，叹下午茶啫。咁远入到嚟，只为食个下午茶？唔系无聊，只因无料，因为喜获4张下午茶自助餐券，就拉埋表哥表嫂，仲有表姪女一齐入去食。一行四人，先约晌东涌东荟城等，再搭酒店免费穿梭巴士入去。表哥表嫂仲话难得入嚟东涌，专灯早啲可以行吓东荟城，而且，见Regala Café旁边有个通道口，原来系条冷气天桥直驳去机场一号客运大楼嘅到埗大堂，步行都系5min-10min，所以食完之后，拣搭迟一两个班次嘅穿梭巴士出返东涌，带个细路参观吓机场。因为表姪女都未搭过飞机，从来都未嚟过机场，无法啦，佢咁唔听话，读书又心散，去远啲嘅旅行，表嫂话等佢乖啲，考得好啲先再讲㖞。下午茶自助餐由3:00pm开始，去到5:30pm，成人$118，小童$98，收加一，比起市区啲下午茶自助餐，大概平二到四乘，仲要有信用卡折扣优惠，经常都见富豪系嘅酒店推出唔少信用卡折扣，长期都有。不过咁，虽然平，但食物嘅选择同质素，跟个价钱又成正比，晌依度确系好少嘢拣，绝对可以
一行四人，先约晌东涌东荟城等，再搭酒店免费穿梭巴士入去。表哥表嫂仲话难得入嚟东涌，专灯早啲可以行吓东荟城，而且，见Regala Café旁边有个通道口，原来系条冷气天桥直驳去机场一号客运大楼嘅到埗大堂，步行都系5min-10min，所以食完之后，拣搭迟一两个班次嘅穿梭巴士出返东涌，带个细路参观吓机场。因为表姪女都未搭过飞机，从来都未嚟过机场，无法啦，佢咁唔听话，读书又心散，去远啲嘅旅行，表嫂话等佢乖啲，考得好啲先再讲㖞。
下午茶自助餐由3:00pm开始，去到5:30pm，成人$118，小童$98，收加一，比起市区啲下午茶自助餐，大概平二到四乘，仲要有信用卡折扣优惠，经常都见富豪系嘅酒店推出唔少信用卡折扣，长期都有。不过咁，虽然平，但食物嘅选择同质素，跟个价钱又成正比，晌依度确系好少嘢拣，绝对可以试匀晒所有嘢，而质素亦平平无奇，无甚惊喜。
第一转开开胃先，所以，理所当然就系沙律打头阵。沙律吧选择少，得几款，先嚟一碟红生菜、九芽菜、粟米粒、车厘茄，加啲油醋汁，伴一件细细件嘅火腿生菜芝士法包三文治。沙律菜几清爽，咬落索索声，油醋汁酸酸咪，叫醒吓个胃，而个法包唔差，外皮松脆，包人软熟。
第二转都系再想食多少少沙律，只拣九芽菜搭紫椰菜，淋上法汁，再加埋哈蜜瓜，菠萝，提子，啲生果料系晌朱古力喷泉𠮶边拎。食咗两份沙律，真系够晒「开胃」喇！
第三转尽试所有热盘食物，包括小笼包、迷你薄饼、什锦炒乌冬、烟肉肠仔卷、宝云酥焗青口、炸鸡宝、羊肉车厘茄串。中式点心仲有烧卖，不过见卖相麻麻，所以无试。咁多样嘢，稍为个羊肉车厘茄串同个宝云酥焗青口见得吓人，其他都系好普通嘢。咁个羊肉串又真系几好食，肉味浓少少膻，肉质柔嫩，车厘茄嘅清爽又平衡番羊肉嘅浓香。而个焗青口以大量面包糠同焗，加添香脆口感。
第四转除咗件法包三文治，再试埋啲手指三文治，一共有两款：芝士火腿同吞拿鱼，吞拿鱼调校得比较干身。反而烘焗嘅猪肉卷同咖喱菜批唔错㖞，两者嘅酥皮都做得香脆，咖喱香得嚟带少少辣，细细件咁，轻易一件接一件呀！
第五转去到依刻，都系甜点时间，餐厅正中间嘅圆枱就摆放咗近10款甜品，先试其中7款，包括：杯装面包布甸、香蕉蛋糕、果挞、鲜果忌廉蛋糕、香梨慕丝饼、特浓朱古力蛋糕、咖啡蛋糕。睇名你都知有啲都系大路货式，不过，其中嘅面包布甸、香蕉蛋糕、香梨慕丝饼、特浓朱古力蛋糕做得颇出色，尤其后两者，香梨慕丝饼很浓梨味，而且颇为清甜；特浓朱古力蛋糕就软滑味浓，质感幼软。
第六转除面包布甸，以小杯形式嘅仲有士多啤梨布甸同云呢拿奶冻，士多啤梨布甸味道比较甜，反而奶冻好食啲，口感好柔滑，上面仲加多一小件马卡龙，令人更讨好。
第七转甜品时间仲未完，梗系要叹番件即做班戟啦，班戟皮做得既薄又柔软，可惜系生果配料选择少，只得水蜜桃同芒果，干配料亦都只系得粟米片同朱古力脆米。不过件班戟都好好食，除因为系新鲜制作之外，加多一球朱古力低脂意大利雪糕，淋埋朱古力酱汁，一冻一热，冰火嘅口感，大呼过瘾啦。
最后一转食咗几转甜品都系仲未止咳，硬系想试埋佢另一款低脂雪糕先想收手，咁好事成双，就朱古力、士多啤梨各一球，再淋啲士多啤梨糖浆，又加啲粟米脆片。虽然雪糕无标明咩品牌，只知系低脂意大利雪糕，但确实口感几软滑。
食物方面稍为逊色，但系就好欣赏嘅系佢个场，一上到2/F，感觉豁然开朗，地方够大，楼底又几十呎高，环境好开扬。由于餐厅系Café形式，全场都系矮矮嘅梳化凳，配大大张长形茶几，梳化凳好坐又好挨，又唔似Pacific Coffee𠮶啲咁大张，令人坐得几舒服，只系食嘢有啲唔方便。虽然环境正，但系可能酒店人流少，餐厅客又少，所以好唔够冷气，奇景就系晌一啲角落位摆放咗好几部吹风机，等啲空气更流通，令人觉得无咁翳焗。除咗环境系卖点，服务都唔错，可能源于客少，加上又系酒店，所以，服务都比较妥贴，斟茶递水都系快手快脚，态度有礼。
张贴
