茶廳 (已結業)

今日难得出到嚟青衣食下午茶，见到青衣城开咗第二期，就过去行吓睇吓有冇新餐厅啦，我同男友都想食传统茶餐厅下午茶，竟然见到咁新嘅商场都有一间茶餐厅，咁就当然去试吓啦！装修好新净，位都好多，又唔会坐得好迫，舒舒服服坐咗系卡位度就睇吓餐牌有咩食，下午茶选择都算多，大部份都系传统嘅嘢食，我就毫不犹豫咁拣咗个花生酱西多士，因为出边一般茶餐厅，西多士都真系只系西多士，但系佢入边有讲明系会有花生酱，就更加吸引我啦，男朋友就拣咗一个咸牛肉煎蛋热狗，我叫左杯热饮，男友叫咗杯冻饮。好快就嘢食到啦，先来花生酱西多士，比我想像中大份， 一块西多士都可以切到成12细旧，份量唔错，可惜佢整得太㶶，有啲黑黑地，未食就感到好干同埋好油，虽然有牛油及蜜糖搭救，你都证明佢系热辣辣咁上，但太㶶，未免有啲失礼！至于男朋友嘅热狗，佢个咸牛肉煎蛋亦都系整得太㶶啦，搞到个包好油好干，所以男朋友都好勉强咁食晒佢😓最后唔知系唔系租金真系太贵，睇张单先至发现原来冻饮都要加＄5 ,比喺出边茶餐厅都只系加＄3 ,感觉真系贵咗啲，仲要杯野唔系真系好大杯添，所以如果真系再嚟食呢间，都系要再谂谂😓