Chop Chop 食神叉燒 (新城市廣場) (已結業)

见有85折外卖自取，放工专登过黎买晚饭。见啲员工细心清洁又有礼貌，买外卖都放心好多。叉烧新鲜，见啲叉烧肉颜色比较浅白就知道首选要买嘅唔使讲一定系「食神黯然销魂饭」，当叉烧、煎蛋、豉油、饭，每样都做得比人好嘅话，就唔系平凡一个叉蛋饭。半肥瘦口感实净嘅叉烧，因为来回烧过几次，𠮶种焦香同平时食嘅叉烧系与众不同。然后咬到肥肉嘅部份，完全唔觉得肥腻，系有少少爽口。半生熟煎初生蛋，仲有自己调校比较杰身嘅烧味豉油，五常米煮成软硬适中嘅白饭，吸收左叉烧嘅焦香同烧味豉油，识食又食过嘅一定会体会到个中嘅美味。切鸡叉烧双拼嘅叉烧同黯然销魂饭嘅叉烧系完全唔同，少好多肥肉但好软淋，焦香味冇咁重。切鸡髀够嫩滑，鸡味好重。份量都OK。比较特别有木鱼丝铺面嘅食招牌干炒牛河，炒得均匀惹味，牛肉新鲜冇渣，都唔错。既然有八五折，就唔争在叫埋咸柠七、咸柠乐。呢度用料唔差，用靓嘅咸柠檬加冰，跟原罐汽水，返到去唔惊冲淡晒。外卖包装企理，盒盒都装满嘅份量，外卖有呢个质素好唔错！