九份•十分 (河畔花園) (已結業)

唔单止餐厅名好台湾，连内部装修都好有心思。什至系筷子同牙签筒，都不忘印上餐厅名。先叫咗两杯饮品..... 阿里山之夜：即系蝶恋花青苹果沙冰，餐牌上张相已经好吸引，原来实物仲正，除咗本身已经有几种颜色，仲附上一盏灯，放杯饮品上去就会著灯，令饮品嘅颜色更鲜艳。而味道都唔错，好fresh，好够冻，啱哂咁热嘅夏天，士多啤梨片都竟然系唔酸嘅。另一杯就拣咗青青草原，即系宇治抹茶牛奶沙冰，好够份量，亦都好够抹茶味，唔似有啲地方嘅只系够冰冻。食面前先食啲小食，呢度嘅台湾盐酥鸡好特别，好够脆同唔多粉浆之余，仲配有六种粉洒上鸡度食，咖喱，芝士，原味，辣味.....，可以每次唔同口味，个人就觉得咖喱味最正。卤水拼盘都唔错，可以拣大／细，两个人叫个细就啱啱好，有鸭舌，鸡翼，猪大肠，鸡蛋，鸭肾，好味！想试细细碗面嘅可以试呢个阿春面线，以前系台式饮品店见过之后就好少地方有得食，好幼好淋嘅面线，配上少许猪大肠同鱼蛋粒，浸系比清汤较"结"嘅汤，细细碗，又易入口，正！另外就叫咗个呢度好似都几出名嘅红烧牛肉面，比想像中丰富，汤亦好够浓味，加点辣味，完全系台湾风味。女仔食嘅话应该可以两个人share一碗。