泰.夯蝦 (諾士佛臺) (已結業)

好耐冇去过旅行啦，尤其系心爱嘅泰国，咁啱见到朋友社交平台之前提及尖沙咀呢一间专门食泰国流水虾嘅放题料理，就算冇得去旅行，都可以顶下瘾吖嘛。一入到去就见到有好多款嘅食物，除咗有专人处理海鲜之外，亦有 好多款嘅烧烤食物， 平均都有几十款食物， 啱晒啲食肉兽，亦都有唔同嘅熟食同小食可以选择。不过最吸引眼球嘅都系坐低埋位就见到个流水虾缸， 慢慢食嘢，唔使行出去 食物区都可以夹到咁新鲜嘅流水虾 ， 够晒方便。第一时间我就出咗去拎海鲜，有大蚬元贝蚌仔等等嘅选择，款款海鲜望落都好新鲜。不得不赞主角嘅流水虾，每只都好大只，好鬼生猛， 而且虾肉好甜好弹牙。不过记得烧之前，要摆佢落冰桶冻晕咗佢先好烧，如果唔系佢就会挣扎。元贝好鲜味，大大粒，少少调味料同蒜蓉已经够好味。薄切雪花牛肉，牛味香浓，烧起油脂丰富，肥而不腻。另外仲有鲍鱼送上，非常大只新鲜， 仲会爆汁，真系好juicy。令我好惊喜嘅系， 呢度竟然有made in Hong Kong嘅雪糕波波，仲有好多款唔同嘅口味，例如榴梿、荔枝、桃、香芋等等，够晒特别，味道香浓，口感软滑， 忍唔住食多两粒。