八方台式麵屋 (九龍城廣場)

营业中

休息中

日日谂食晏食咩谂到头痛，又唔想订位，又唔想太油，又唔想太远。虽然呢间台湾野都几远，但听同事讨论过话几好食，咁就早啲出发试下。黎到都13：07啦， 排哂队，收银姐姐一脚踢，又听外卖电话，又卖餐，又叫人执枱，又要搞啲外卖平台单，可以睇得出佢一头烟。建议最好唔好中午一个人黎，因为佢系排队落单买野，我一个人无办法揾位，好好彩阿姐帮我落单时佢叫我hold一hold,即刻揾到个位俾我，如果唔系源源不绝既人流我根本无可能又排队买野又揾到位。间铺唔算大，但人手都唔够，得一个送餐执枱一脚踢既姐姐，同个后生仔（应该系做水吧既，负责送餐饮）。出餐唔算快，面食好似需时耐啲，我见隔离位都要等20-25分钟先有面食。我嗌左个卤肉饭加夜市小食。碗饭啲卤肉大大粒，几惹味，又有三条菜仔，不过真系好大碗，我肚饿去食多左都食唔哂。夜市小食系盐酥鸡同花枝丸，花枝丸有三粒，好味🤤。鸡都炸得几好，不过全部岩岩炸起，食完之后个上颚有啲损左🤣。个餐加$10换杯蜂蜜柠檬，甜得济同热得济，拎都拎唔到。总括而言呢餐都食得满足，同劲饱。$70喺旧区食一个台式午餐.....如果佢个饭细啲，计番我$60蚊，就更好啦。