文鼎酒家 (已結業)

楼下【南方舞厅】食评，结尾系咁写嘅…“会不会再来 ? 只要有人生日都有机会再来。”机会终于嚟啦，因为上个月尾我生日，佢就系约咗我去【文鼎酒家】！当晚一行十个人，食咩𩠌……当然由【南方舞厅】发办，先嚟几个小食，包括味道OK，但唔算好突出‧再嚟个汤，应该系花胶炖唔知咩…见个汤底咁浓，都知靠得住，一饮…润呀~~「包公牛小排」，肉质超腍兼超级入味，忍唔住叫咗碗饭捞一捞！跟住再嚟「金牌扣肉」，样就好出色，但又唔系我期望咁好味！确实有斗零失望……「苔香九肚鱼」，外极脆内超滑，正！「炒年糕」，味道唔错！唔知咩娃娃菜，一样好味！连碟普普通通嘅「姜汁炒芥兰」，D芥兰可以炒到咁鲜嫩爽口，真系愈简单愈见真章！临尾嚟个生煎包，皮脆肉嫩Juicy，无话可说！当然最后例牌嚟个生日必选，成个足球咁大嘅「东方之珠」，以为系Gimmick嘢，估唔到食落又好好味，虽然油腻咗少少！呢餐生日饭，又好味又唔使俾钱，正！不过偷听到佢地一人夹 $480，哗！所以我嘅结论系……同【南方舞厅】一样，对【文鼎】感到非常满意！但我嘅结尾果句，就会同佢有少少分别……“会不会再来 ? 下次我生日，都希望朋友请我来食多次！”