唯一雲貴川風味

营业中

休息中

钟意食辣嘅人应该唔会对荃湾四陂坊嘅唯一云贵川风味感到陌生，我好耐之前都食过几次，不过事隔太耐，加上之前无好好咁用文字记低，对佢嘅味道已经有少少模糊，于是呢次外卖就买咗小辣作为热身。朋友𠮶碗配料拣咗猪肠、腩肉、猪头肉，我就系腩肉、猪头肉、豆卜。猪肠都几多肥膏，不过食落香口。猪头肉骨位爽脆，肉软腍有胶质。腩肉肥瘦均匀，切得大片唔薄身，本身已经有明显嘅调味，有咬口得来又松化。豆卜食落外烟韧内软绵，吸满汤汁都唔错。米线偏粗同软身，外卖返去𠮶阵系同汤一齐放晌同一只碗度，不过浸晌汤度咁耐都无话变得太腍。汤入面仲有唔少酸菜、芽菜同芫茜，小辣嘅汤面泛起薄薄一层辣油，仲将成碗染成红色，睇落都几吓人，但饮落嘅话辣味轻微，味浓又唔会过份重口味，食完都无乜觉得好口渴。