Neway Karaoke Box

营业中

休息中

最近逢星期三可以$99唱K，今次去嘅系佐敦分店，好耐冇去过K房嘅我印象中唱亲K都系食颓饭，但原来而家啲嘢食质素又ok㖞👍🏻。香煎鸡扒-薯条（松露汁）（$40）黄金时段加$40就食到一个正餐，价钱真系劲抵！个卖相已经令我好惊喜😍件鸡煎得都几香口，个皮有轻微脆面嘅感觉，虽然有啲油，但都系可接受范围内～而鸡肉都几嫩滑，冇雪藏味，呢个价钱嚟讲都物超所值！鸡扒可以拣黑椒汁或者松露汁，我拣咗平时冇咁常见嘅松露汁，个汁比想像中稀少少，味道唔算好浓，但闻落都算香，同行朋友拣咗黑椒汁，个人觉得松露汁更值得一试！另外跟餐可以拣配饭/意粉/薯条，我就拣咗薯条，份量都好多，虽然一睇就系翻焗嘅冷藏薯条，但食落好够脆，个人觉得比卖相更出色！配埋松露汁都几好食，真系有松露薯条嘅感觉，就好似upgrade咗咁😂不过缺点同样系偏油，如果摆耐咗就更加明显～但讲真晚市做呢个价钱真系无咩要求啦，整体都算好抵食。