老點點心竹筒飯 (已結業)

中秋节做完gym好肚饿，去附近嘅老点点心医肚，大概下午2PM，门口已经坐咗7,8个人等枱，呢间老点点心果然多捧场客！由于2人枱，等咗约5分钟就有枱啦！个人觉得老点点心好啱2个人去食，因为每样点心都系得2~3件，份量唔多细细件。第一次食老点点心，叫咗佢嘅主打招牌菜－老点小汉堡，外形相当迷你的骰，一啖就食咗佢落肚！汉堡包皮煎过，入面夹住一旧炸到好香口嘅炸虾，仲有沙津菜同WASABI味道嘅沙津浆，好好味，不过略嫌份量太少，一啖就冇咗。鲜肉响铃肠粉，就好似炸两嘅变奏版。个皮做得好出色！个皮好滑好嫩，已经令我好开心，入面响铃好脆口，好味道！咸香黑鱼子烧卖，非常普通，味道唔突出，只系普通嘅烧卖味道。清酒云吞鸡，一打开个迷你煲盖嘅时候，好大阵清酒味扑鼻，有几粒鸡肉、几粒云吞，云吞包得好扎实，应该系手工整做嘅云吞，鸡肉肉质太冧，冇鸡肉，败笔也。个人好钟意食马拉糕，所以见到斑兰马拉糕即刻双眼发光！食落口其实同平时食嘅马拉糕味道好似，但就闻到好香嘅斑兰味，可以一试。下次会再帮衬。