博多拉麵別天神 (已結業)

有史以来第一次觉得要写食评！无意中揾到呢间唔起眼嘅小店食拉面，格局好似喺日本街头嘅地道小店。虽然面嘅款式唔多，但反而对有选择困难嘅食客可能系一件好事。自己㩒机落单俾完钱，就可以坐定定等面到。日式叉烧拉面周围都食到，但呢度嘅汤底好香，味道啱啱好！最欣赏嘅系佢嘅叉烧！(我一向对日式叉烧无好感！) 无论系喺日本定香港，都从来未食过口感咁好嘅日式叉烧！食落去肉质仲系好 juicy，但又一啲都唔肥腻。𠮶种好味我实在唔识形容，总之就系食完之后好想俾其他人知道喺旺角闹市入面有一间 hidden gem，一定唔可以错过！食完之后，店入面我觉得似系老板娘嘅女仕好有礼貌咁多谢我。虽然戴住口罩，但你仍然可以见到佢喺口罩下面非常灿烂嘅笑容，系发自内心，而唔系公式化嘅笑容！因为小店座位有限，所以最啱自己一个或者拍住拖嚟食！