影片
更多
2012-02-24
62 浏览
近年，比较少咗去食自助餐，无话好特别原因嘅，可能想悭番啲钱啦。反正，太太成日话食自助餐唔抵，平𠮶啲啲嘢又麻麻哋，贵𠮶啲又唔食得佢几多，俾四、五百嘅话大把好选择啦。不过咁，又唔系话完全唔食，总有好多例外嘅，又成人都听到人讲，依个世界岂有免费午餐架？今趟个自助午餐，就系其中之一个例外喇！事缘某某信用卡嘅推广，旧客户推荐新客就送双人自助午餐，而新客当然又有迎新礼品啦，依啲双赢著数，自不然唔会放过，咪由我老婆推荐我依个新客啰！当然，都真系唔系完全免费，我都要填表影印文件架！少少付出咁啦，哈哈！Park Café都好多年无嚟过，成日见佢卖广告，记得以前间嘢地方无咁大，而且阴阴暗暗懒有气氛咁，依次再嚟，感觉唔同晒，地方大咗，环境光猛咗，装修简洁明亮，最钟意入门再入啲左手边嘅一排卡位，高椅背，坐得舒服。招呼方面都唔错，收碟、斟水又几快手，可能系因为星期六晏昼啩，个场都唔系好多客，约5乘左右。另外，食物补充方面都OK，唔会话成日无晒嘢，而且，即煮即做嘅档口，大部份时间都见有师傅驻守。由于今日同老婆都唔使返工，所以校啱准时12:00nn到，被安排坐晌卡位，感觉真好。甫坐下，同老婆就开始各自「揾食」，未拎
Park Café都好多年无嚟过，成日见佢卖广告，记得以前间嘢地方无咁大，而且阴阴暗暗懒有气氛咁，依次再嚟，感觉唔同晒，地方大咗，环境光猛咗，装修简洁明亮，最钟意入门再入啲左手边嘅一排卡位，高椅背，坐得舒服。招呼方面都唔错，收碟、斟水又几快手，可能系因为星期六晏昼啩，个场都唔系好多客，约5乘左右。另外，食物补充方面都OK，唔会话成日无晒嘢，而且，即煮即做嘅档口，大部份时间都见有师傅驻守。
由于今日同老婆都唔使返工，所以校啱准时12:00nn到，被安排坐晌卡位，感觉真好。甫坐下，同老婆就开始各自「揾食」，未拎嘢食当然先巡视一下有咩食先，好概略计划一下自己个「揾食」攻略。食物分类有沙律、冷盘、寿司及鱼生、中西汤、生滚粥档、铁板烧、多款热盘、咖喱吧、切肉车、即煮车仔面档、生果、甜品，而啡茶、柠茶柠水任斟任饮，大致上都有成60、70款以上嘢食，绝对填得满满你个肚皮。至于质素方面，食物都唔系咩贵价嘢，但整体都属中等，平平中偶有佳作，以折咗之后百松啲一个自助午餐，都称得上抵食，除非你系个惯食好嘢、样样要精嘅人，否则一班老友聚聚旧，平平哋，任拣任食，依度都系唔错囓选择！
沙律沙律吧有8、9种沙律菜同配料，如粟米粒粒、车厘茄、甘笋丝……等，再有4款酱汁同油醋可拣，基本上都可以自制一份美味沙律作头盘。当然，唔想烦嘅，可以拣食预制调校好嘅沙律，例如：长通粉沙律、苹果沙律……等。我就钟意两沟，再加啲生果、冷盘嘢同鱼生作为头盘嘅，砌出嚟咁先似样嘛，唔少得加番少少凯撒沙律酱，咁先至好食！
冷盘
冷盘食物唔多，一眼睇晒，就系眼前𠮶两盘，一个系冻切肉片，另一个系烟鸭胸，水准一般啦。
寿司、鱼生
晌冷盘旁，就系放有寿司、卷物同冷面。寿司同卷物无试，因为睇落好一般，反而荞麦冷面夹咗少少嚟食，做得几清爽，口感幼韧；而鱼生则放晌另一边档口位，由师傅即点即切，虽只供应三文鱼同立鱼，但算几鲜味，我就加咗落去啲沙律当前菜一齐食！
中西汤中汤系冬瓜汤，而西汤系普通忌廉汤，完全无卖点，所以，只有浅尝半碗中汤就算，叫无味精啰。
生滚粥档
虽然嚟食自助餐拣食粥好似好傻，不过咁，食嘢都系想食自己钟意嘅嘢。喜欢食粥多过食饭嘅人，又不妨要碗生滚粥落落肚丫，唯可惜选料唔多，否则，吸引力应该大好多，尤其啱老一辈嘅食客。
铁板烧负责生滚粥档个师傅，亦负责埋铁板烧，位置晌食物区最埋嘅角落位。不过，虽然佢个牌「栋住」铁板烧Teppanyaki一组大字，但睇真啲查实只系串烧啫。有鸡肉串、粟米、墨鱼嘴同肉肠，样样同老婆夹埋嚟食啲，质素还可以啦，系个墨鱼嘴几过瘾；反而酱汁惹味突出，因为热住热住，感觉唔同啲。
热盘
热盘唔算多，一开始约有12款，其后都有转过款。部份热盘都觉得唔错㖞，好似当中嘅烧鸭配柚子蜜、巴东烧鸡扒配芝麻汁、椒盐三文鱼头腩、杯装蒸蛋，依几款确系较特别，又几好食，好似个烧鸭配柚子蜜，咸咸甜甜，鸭又唔膻；其他嘅，如烧肋骨、煎秋刀鱼、芝士焗时蔬、焗长通粉、炒饭……，味道都唔差，只系无咁突出啫。
咖喱吧专灯设个咖喱吧，有啲吸引性。一共有3款食物，再搭一煲白饭同一啲印度薄片伴食咖喱，3款食物包括咖喱牛腩、炸鸡同咖喱时蔬，基本上，3款都甚有水准，咖喱几香而唔系死辣，牛腩做得好腍。
切肉车隐身晌车仔面档侧边，佢又冚埋咗个银箱，又唔见有师傅晌度㖞，咪以为系无供应啰。原来，负责面档个师傅又系负责烤肉，佢见我眼望望一脸疑惑，就问我系咪想要喇。是日嘅供应系烧西冷，就叫师傅薄切两大片，蘸芥辣食。果然唔错，有肉味，烧到里面仍然系粉粉红红，但唔会话有血水渗出，很嫩很软。
车仔面档
本来真系无谂过会晌度食车仔嘢，但最后都有食到，就因为系阿师傅推介，切完肉俾我嘅师傅，佢又负责个面档，就介绍话啲牛杂好食，见佢盛意拳拳，就一于试吓。丫，又估唔到啲牛杂真系几得，牛杂炆得够晒腍，尤其啲牛孖根，既腍且滑，而且啲汁很有卤水香，少少意想不到添！如果唔系留番少少肚（其实都唔少）扫甜品，一定添碗白饭捞汁啰，哈哈！
甜品阵容都几鼎盛㖞，中式西式、有冻有热，成十多廿款，不过都系常见嘅货色、一般嘅质素，如果唔系特别对甜品有好大兴趣嘅，其实眼见依啲应该都好满足。不过，对我依类甜品鬼见愁，就未够尽庆。所以，今次无试匀晒所以甜品，都系重点出击，先嚟一大碟私伙甜品拼盘，有蓝莓芝士饼、松露朱古力蛋糕、芒果蛋糕、朱古力慕丝蛋糕、苹果挞、栗子蛋糕、桂花糕，后尾再出咗款意大利芝士饼，照杀！其实咁多款都有水准，只系略嫌大路啲。最后冲刺嘅，就系加多一份即制窝夫配鸳鸯雪糕球（可惜系牛奶公司啫），同一份即制香蕉班戟现红莓酱，因为两者都系新鲜即制，都系特别好味，尤其个窝夫，好脆口。我老婆都话服咗我，起先话人哋啲甜品系一般货色，但最后又食咁多，叫我千祈唔好出咗门口呕番晒出嚟呀！OK㖞，我大肚能容啫。
张贴
