小娘惹 (已結業)

Book mark 左呢间餐厅好耐，首先系喺苹果肥佬黎嘅节目入边见到佢嘅介绍，一直都想去，去过三次都碰门钉，因为佢嘅营业时间剩系得晏昼，而且有啲大时大节都唔开。越系食唔到就越系想食🤣🤣🤣我都有啲担心会唔会因为咁，期望越大失望越大。最后佢真系冇令我失望，我点左招牌娘惹海虾喇沙。首先一定要赞嘅系佢个汤底，又鲜又滑又creamy又重喇沙味，饮个汤都唔会觉得口渴。然后要赞嘅系佢真系好足料，有三只好新鲜又大只海虾、狮蚶、豆卜。海虾鲜甜肉实，狮蚶无泥味又够鲜。食到我真系开怀欢笑🥰🥰🥰🥰🥰好幸福！另外都叫咗海南鸡饭，呢个虽然都OK，但比起来就相对地失色。我觉得佢鸡件唔系好够滑，而且酱料味道正正常常啦，油饭我觉得如果可以再香d就更加开心啦。如果大家想食，记得上社交平台睇咗佢开放时间先，同埋有心理准备要等位啊，我哋都等咗成九个字先入到去。