女人街食飯公司

营业中

休息中

女人街食饭公司系一间走怀旧风嘅中菜馆，无论门面定店内每个角落都布置到好似七八十年代咁，折枱上面冇铺枱布，好似去左大排档咁，不过室内其实有冷气，唔怕食到大汗耷细汗。门口哩对龙凤都唔知有几多年冇见过喇，好有亲切感。一入门口左边个收银位上面个铁丝网仲夹左啲怀旧杂志，亮点一定系包时兴隆。金沙脆鲜鱿($108) - 鲜鱿炸浆好薄好脆，上枱时仲熬辣辣，食落去仲系辣口嘅，咸蛋黄味都好重，非常邪恶好啱𩠌酒。彩椒黑醋脆猪柳($108) - 猪柳切成条状一口一件，食落甜甜地脆脆地，中间仲加左彩椒同腰果落去炒，香口又开胃。金银蛋浸时蔬($88) - 时蔬我地拣左苋菜，菜量都算多，苋菜唔会太老亦冇沙，食完菜仲可以饮两啖汤。老虎大虾龙虾汤脆米泡饭($128) - 龙虾汤入面除左泡饭，仲有老虎虾同冬菇片，龙虾汤好惹味，但又唔会太咸，食之前再加埋啲脆米上去，脆卜卜咁几好食。总结，每样野食都热辣辣又好食，地方虽然扮街边大排档，但环境非常干净又有冷气，好多打卡位，最啱同一班朋友黎，不过真系好多人食，未够7点已经坐满人仲有好多人等位，最好早啲黎攞位或者预早book定枱。