橫浜街場 (已結業)

打边炉系香港人嘅至爱，但系有唔少人都惊会好肥。黎横浜街场打边炉就啱哂喇，因为餐厅主打木桶火锅，本身衫木有杀菌同埋消除疲劳嘅作用。而更加惊喜嘅系，最底层冇油嘅汤会通过木桶外内层中间嘅空间回流番去木桶入面，好似喷泉火锅咁，，而且有层鹅春石隔走杂质，咁就唔洗怕饮到油腻腻嘅汤喇。我地点咗推荐嘅花胶螺头药膳鸡锅，材料丰富，包括新鲜鸡、花胶、响螺头、人参、杞子、红枣等，药膳味浓郁芳香，要饮番几碗养生先得。鸡肉嫩滑，而侍应话花胶最好等半个钟先食，因为要等佢索哂啲汤汁先更加滋味。餐厅提供咗唔少牛肉嘅种类，今次我地试咗牛颈脊，侍应提议系涌出黎嘅汤底下渌，果然冇咁油腻，而且突出到牛肉嘅鲜甜，肉质滑口。见到有特色炸鱼皮，谂住睇下有咩特别。原来系鱼皮上面酿咗一层厚厚嘅墨鱼肉配虾米，即叫即炸，可以即刻食或者浸落汤底。最后仲叫咗新鲜猪颈肉，厚切，但系唔难变熟，肥瘦均匀，有口感。