囍鍋蒸氣火鍋專門店 (已結業)

去咗尖沙咀天文台道8号，呢栋商业大厦入面聚集咗唔少食肆，今次就试试囍锅。入口旁边有几个大鱼缸，养咗唔同嘅新鲜海产。佢哋嘅楼底够高，空间感十足。可能因为踏入夏季天气开始热，当晚嚟食蒸气锅嘅食客唔算多。呢度嘅蒸气锅都系用竹帽咁嘅盖盖住，同埋锅底可以煮粥嘅。先食刺身，三文鱼个口感几肥美。呢个系未切嘅象拔蚌仔，大约等如成人手掌嘅大细。之后就拎入厨房去内脏同切条，蒸熟咗咬起嚟脆身鲜味，个人觉得唔错。中虾嚟到𠮶阵仲郁紧，蒸完之后虾肉好厚同弹牙。顺德污糟鸡嘅鸡件入面有红枣、冬菇、虫草花、大头菜丝，鸡肉唔嚡口，调味又唔会太过浓。蔬菜有茄子、秋葵、菜心等，不过我哋就试咗田园孖宝，其实系切片南瓜同番薯，南瓜软绵微甜、番薯就几粉嫩。嚟到甜品环节，桂花糕入面嘅杞子令佢好清甜，餐后食系几滋润嘅。经过一轮蒸海鲜同其他食物嘅过程后，石锅入面嘅粥都煮好喇。仲可以配埋炸脆片、葱花、芫茜或大头菜粒嚟食。