日日香鵝肉飯店 (和富中心) (已結業)

上次吃过红磡店,今次经过和富中心见到又心痒痒就走入去食,由于铺头喺地库,人唔算多,坐得非常宽松舒适。我哋二人叫咗一个狮头鹅皇饭同狮头鹅肉饭,仲加多两杯饮品。狮头鹅皇饭好丰富,有鹅片、鹅肝、鹅肠、卤豆卜、卤水蛋…希望冇数漏,用一个大碗载晒咁多材料,睇见就流晒口水。我叫嘅狮头鹅肉饭,分别就系冇咗鹅肝同鹅肠,真系觉得有啲遗憾。首先冇得食好爽口嘅鹅肠!又冇得食潮式鹅肝! 虽然鹅肝size唔大,但系做得唔错。可惜我心里面仍然念念不忘想当年喺潮州食嘅鹅肝,入口溶化不油不腻嘅鹅肝,同西式煎鹅肝嘅方法不能相提并论,好神奇嘅口感,真系食到有飘飘然嘅感觉!好似太夸张㖭,总之暂时香港都未揾得到。一边食饭一边见到旁边嘅电视不停loop谢霆锋同杨千桦,讲佢地去食呢间卤水鹅嘅节目片段,仲有大大嘅poster,写住"澄海卤",系国家非物质文化遗产㖞!我谂呢间铺头喺国内真系唔惹少,香港仲有好几间分店。呢间舖头谂到用碟头饭嘅形式卖卤水鹅,经济实惠,啱晒我呢啲有时想食卤水鹅,又唔想买半只咁多嘅人。整体食物水准真系唔错,如果唔系我都唔会番食其他分店啦。