潮庭 (已結業)

朋友买咗个团购餐， 吹鸡约埋去食饭，我好耐冇嚟和记大厦嘅潮庭， 呢间环境寛濶，唔会坐得太逼狭。个四人份量团购餐价值$638， 头盘先上三小碟，用英式下午茶𠮶种三层盘装住， 几骨子㗎! 第一层系卤水豆腐伴鹅片，肉质尚算嫩滑！第二层系小黄瓜拌海蜇，最底一层系猪脚冻， 猪脚汁精华雪冻之后，好似果冻咁滑滑 ，入口即溶， 好鲜味!第二度菜系蟹肉花胶丝素菜羹 ，蟹肉唔算多， 素菜清清地， 唔会太重味，几好!第三个系芝士焗龙虾伊面, 略嫌芡汁太多, 有改进空间!第四个系葡汁鸡球伴烧饼, 椰汁味好浓， 不愧系偷饭贼，惹味开胃，不过烧饼就比较油腻！第五个系奶汤枝竹浸翡翠， 材料几丰富吓， 有支竹、银杏、杞子同小豆苗。第六个，亦系最后一道菜，就系南瓜咸肉粒炒饭。 如果南瓜煮得淋啲，𠮶饭炒得透啲，会更加好味㗎！