影片
更多
2021-06-08
1277 浏览
系冇得去旅行嘅时期，赤柱绝对系一个放假chill下嘅地方，赤柱出名好多连锁店，但当中都有一啲小店值得一试。今次去赤柱食既系万恶之首西多士，西多士由细食到大，绝对系香港人既comfort food，系茶记下午茶既数一数二美食，但其实西多士最初系来自法国，用牛油煎香面包，嚟到香港个时先变咗做油炸，而且变成茶记嘅名物。呢个年代既西多士已经越黎越多口味，好似咖央西多士就系传统马来美食咖央同西多士既结合，香港唔算有好多地方可以食到。而今次赤柱呢间小店，正正可以食到咖央西多士。呢间泗益系赤柱一间50几年老字号既街坊茶档，牌档档主系赤柱原居民，茶档吸引咗唔少唔系住赤柱嘅人慕名而来，小店藏身喺赤柱市场道回旋处旁既寮屋群入面，周边有赤柱市政大楼，门口隔离有一个生果档，旁边就系赤柱市集，食饱仲可以行吓。小店茶档内，西多奶茶咖啡粉面基本上都有，最受欢迎嘅就系佢嘅主打咖央西多士，亦都成为赤柱嘅名物，营业时间好短，有时都要排队，要食西多士要好有恒心先得。我前后嚟过两次，第一次系星期六嘅朝早，因为知道餐厅好早收所以12点就嚟到，嚟到先知原来星期六、日、红日系冇西多士，因为个师傅放假，老板娘同我讲要平日先有，所以第
系冇得去旅行嘅时期，赤柱绝对系一个放假chill下嘅地方，赤柱出名好多连锁店，但当中都有一啲小店值得一试。
今次去赤柱食既系万恶之首西多士，西多士由细食到大，绝对系香港人既comfort food，系茶记下午茶既数一数二美食，但其实西多士最初系来自法国，用牛油煎香面包，嚟到香港个时先变咗做油炸，而且变成茶记嘅名物。呢个年代既西多士已经越黎越多口味，好似咖央西多士就系传统马来美食咖央同西多士既结合，香港唔算有好多地方可以食到。而今次赤柱呢间小店，正正可以食到咖央西多士。
呢间泗益系赤柱一间50几年老字号既街坊茶档，牌档档主系赤柱原居民，茶档吸引咗唔少唔系住赤柱嘅人慕名而来，小店藏身喺赤柱市场道回旋处旁既寮屋群入面，周边有赤柱市政大楼，门口隔离有一个生果档，旁边就系赤柱市集，食饱仲可以行吓。小店茶档内，西多奶茶咖啡粉面基本上都有，最受欢迎嘅就系佢嘅主打咖央西多士，亦都成为赤柱嘅名物，营业时间好短，有时都要排队，要食西多士要好有恒心先得。
我前后嚟过两次，第一次系星期六嘅朝早，因为知道餐厅好早收所以12点就嚟到，嚟到先知原来星期六、日、红日系冇西多士，因为个师傅放假，老板娘同我讲要平日先有，所以第二次我就星期五朝早再去。西多士每朝11点就会开始有得供应，平时差唔多12点几可能就会卖晒。两次嚟到餐厅都接近满座，好彩嘅系两次黎都唔使等位就有得坐，座位唔多，所以如果一个人嚟有机会要搭枱，两次食完大概12点几，已经见门口有人排紧队。
餐厅系港式茶记怀旧格局，外型设计同六十年代既牌档相约，系一个铁皮屋，有绿色帐篷遮盖，入面嘅枱櫈都好似街市嘅熟食中心咁，以红绿色为主调，档身内系煮食空间，后面系储存空间，档身嘅左右两边会见到堆起左黑白啖奶同金多植脂淡奶，中间嘅空位就系老细递嘢食上枱比客人嘅地方，档顶都有一个已经生锈嘅金漆招牌。用餐区就系牌档既前面，地方唔算大，得四张枱，都系一啲折枱同胶櫈。餐厅因为冇冷气，所以夏天佢会有少少热，只会有几把风扇，虽然环境唔理想，但依旧客如轮转，无阻大家一试怀旧风味既心情。
特别一提既系其实呢个铺位系有两间餐厅，正门行入黎既就系泗益，而后面个间系民益，民益系食中式粉面同车仔面为主，同大家慕名而黎食西多士既泗益系两间唔同既餐厅，枱櫈唔系共用，如果一心想食西多士记得唔好行过龙，避免尴尬。
Menu得一页纸，都系提供一啲茶铛大排档嘅常见嘢食，当中最热门嘅一定系西多士，观察周围嘅食客，应该只有山长水远嚟赤柱嘅人先会食西多士，赤柱嘅街坊反而只会叫一般嘅猪扒面、沙嗲牛肉面等等。
-
1️⃣ 咖央西多士 💰30（👅: 9/10）
咖央西多士
$30
63 浏览
2 赞好
0 留言
咖央西多士落单等咗10分钟终于上菜，西多士外表炸到金黄色，新鲜整出嚟所以热辣辣，闻到啲香味，西多士会切成六块，外表睇落偏圆，同出边四四方方嘅西多士唔同，个样系不规则，西多士系几厚身，而且胀卜卜。
呢个西多士同出边嘅做法有啲唔同，师傅首先会将蛋白同蛋黄分开，然后将蛋白人手高速发打打到起泡，挺身之后先会将啲蛋黄落去沟埋一齐，再沾满两片本身已经搽左自家制咖咉酱既白面包罗去用高温油炸，所以呢度嘅西多士口感同出边系完全唔同。西多士最特别就系佢咬落非常软绵，非常松软，绵到好似棉花糖同疏乎厘一样咁，完全唔觉得自己系食紧面包咁，软绵程度系我食过咁多个西多士最软绵既一间，冇一间西多士可以媲美到呢一间，面包同咖央外层已经融为一体，面包食落偏湿润，而西多士嘅外层咬落会有少少脆口，呢个特别嘅口感绝对系佢嘅卖点。
咖央西多士
$30
123 浏览
2 赞好
0 留言
西多士入口系非常之重蛋味，蛋味重到系我食过咁多间西多士最重嘅几间之一，同上环瑞记咖啡既西多士差唔多，唔多唔小系因为用既系土鸡蛋，土鸡蛋同鸡蛋外观睇落唔大分别，但超浓既蛋香味确实令人留下深刻印象，而且可以见到小店上面有装满鸡蛋既篮。而西多士上面有两块大牛油，牛油好快就融左，带有少少咸香，令到蛋香味更出。呢度西多士标榜唔使落糖浆，即使西多士唔放糖浆或者炼奶其实都够甜，因为入边嘅咖央味好突出，咖央酱主要用砂糖、椰奶同椰汁制成，所以食到小小椰香，而且已经够甜，净系普通牛油已经同西多士好夹，整体食落唔会太甜，入面嘅咖央酱都唔会话抢咗啲蛋味，咖央酱香甜可口，甜味同蛋香相辅相成，甜度同各方面嘅味道都平衡得几好。
西多士要挑剔嘅就系佢食落比较油腻，因为佢个西多士都布满左油，会有少少油溢味，略嫌西多外层可以再脆啲。要总结依个西多士就系，如果你钟意食超松软嘅西多士，或者你钟意食蛋味好重嘅西多士，咁呢一间非常适合你。
-
2️⃣ 咖央多士 💰13（👅: 7.5/10）
咖央多士
$13
40 浏览
1 赞好
0 留言
呢一个咖央多士系我星期六第一次去𠮶时冇西多士而叫嘅多士，佢就系烘左嘅多士不过搽咗咖央酱。多士等咗唔使10分钟就上枱，多士食落够脆，入面有咖央酱，嫌牛油味唔够，同埋西多士相比下无咁出色，因为无左西多士既超松软口感同蛋香味。
-
3️⃣ 冻奶茶 💰17（👅: 8/10）
冻奶茶
$17
26 浏览
1 赞好
0 留言
奶茶系用丝袜泡制，饮落好香好浓滑，即使系冻奶茶但都会饮到茶底带落嘅小小苦涩味，但饮到𠮶一刻同时就会俾佢嘅奶中和左，茶味会比奶味重一啲，整杯奶茶饮落够甜，饮到最后茶味唔会话减淡，可见茶味有几浓郁。略嫌可以再滑啲，但夏天饮到够冻唔苦既奶茶，已经系凉透心，一大乐事也。
-
🌟味道来讲，佢嘅咖央西多士系几出色，但星期六、日同红日食唔到，如果要平日特登放假去食呢个我觉得就未必值得，除非本身想去赤柱放假，咁顺路就好值得一试。价钱来讲系非常合理，份量充足，虽然赤柱算系游客区，但野食都唔会定价定到好进取，反而系主要做街坊生意。
餐厅入边得老细两公婆，落单完全唔使写低非常好记性，但因为得两个人人手可能唔系话好充足，唔会好得闲咁特登行过黎同你落单，反而可能要佢经过时举手，或者特登行去近门口既老板娘度落单。佢地主要做街坊生意，见佢地同一啲赤柱街坊有倾有讲，我系第一次嚟，唔知几时有西多士所以第一次帮衬完有特登问老板娘，佢都好有耐性解释，唔会系澳牛串串贡语气，老板唔会因为人潮汹涌而黑面。
第二次黎呢度系自己一个嚟，食食吓有个食客搭枱，佢见我系咁用手机同相机影相，就问我系唔系foodie，见佢同老板娘轻描淡写咁落单，应该系赤柱居民，倾咗几句佢祝我成功，食完碗面就走咗。系唔系个个赤柱居民都咁热情，定系因为系呢个有人情味嘅小店食野，大家都稍为放低社交距离？
系呢个食野偏贵、连锁店同外国西方餐厅林立既赤柱，泗益就好似一间清泉，一间好似格格不入既大排档，定价亲民，而且唔系食外国菜，而系香港本土既味道，系香港人既人情味。食下西多士、感受香港市集文化、去海边吹风，系香港慢活既好方式。
-
👅味道: 8.5/10
🍴环境: 6.5/10
💰消费: $47 (服务费: NA)
张贴
