好媽媽台灣館 (已結業)

因为睇过电视节目介绍呢间食肆，决定去试吓。今日下昼近２点去到，地点唔算旺都坐满８，９成人，估计唔系太差。呢度装修系小店格局，简简单单，有卡位，有电视睇。睇餐牌啲食物，饮品都经济实惠。我叫咗个午餐＄３３，卤肉饭拼盐酥鸡，包饮品，我拣咗热茉香奶茶。如果系学生仲平＄３。未上菜之前以为盐酥鸡最多得两三嚿，点知上菜后有惊喜，有成５件盐酥鸡。上菜速度快，唔使５分钟，啱晒唔使急最紧要快嘅香港人。卤肉并非其他台式食店惯用嘅免治猪肉，而系切碎嘅猪肉(似系猪腩肉)，虽然略咸，但好送饭，有诚意之作。有半只溏心蛋，冻嘅。仲有少量椰菜。盐酥鸡好脆，好好食。杯奶茶初时饮觉得好甜，但饮饮吓可能适应咗，觉得甜度适中。好香茉莉味。佢嘅颜色同出门嘅台式奶茶唔同，青黄色，如果净系睇颜色唔知呢杯系乜。呢个餐真系超值，以呢个价钱，唔俾碟盐酥鸡都够份量。我老公散叫咗一碟台式炒米粉＄４５，面头淋咗卤肉。啲米粉比一般新竹米粉幼。呢道菜都几好食，系油咗啲。呢餐都几满意，食物够地道，又抵食夹大件，会再帮衬。