稻香訓練酒樓 (已結業)

呢间野出晒名抵食，星期一至六下午茶时段半价，但系好难 book 位，同埋无得 walk in ，要有会员卡。平日因为要返工，所以得星期日先得闲，难得同屋企人饮茶，所以正价都无所谓。book 左12点，但都要等一阵先有位。佢冲茶果到系自助式，禁粒制会煲水，同一般酒楼唔同。大约12点15分到落左第一次单，点左我爸爸最爱食既牛肉球。过一阵点心陆续送上，讲真味道同出面一般酒楼无乜分别，你话佢新鲜即场整我又唔觉特别好食，正正常常。过左大约半个钟，所有点心食完，唯独牛肉球仲未到，咁我就催左一次，问系咪漏左单(用手机点单，无理由会漏)，个 waitress 话整紧好快到，过多10分钟都仲未到，咁我又催第二次，个 waitress 即刻同个上司讲，话我个牛肉球都仲未到，我心谂，上司出马应该好快到喇挂。再过多10分钟，牛肉球终于到，但竟然唔系比我呢台，系比隔离台，真系讲晒粗口。我即刻起身埋单，同个 cashier 投诉，乜今日无牛肉咩？你咁大间酒楼，漏单唔紧要，我等你整好，但我催左几次你都 hea 我，服务真心差，唔会再去食