金記冰室 (新港城中心4期) (已結業)

我第一次食，以后都唔会再帮衬，唔知系唔系因为楼面太少员工，出餐出得好慢，我叫咗一个牛肉炒通粉，违反商品说明条例，出到嚟碟嘢同张相争好远，𠮶啲牛肉细粒到放大镜先睇到，真系连粒洋葱都大过佢，仲有唔够干身，成碟都系汁，同埋味道真系好一般，不过普普通通茶餐厅唔会有太大期望，食晒成碟通粉杯热奶茶都仲未嚟，半个钟嘅时候催咗一次单，个职员净系开部落单机望一望我有冇落过单跟住就叫我等吓，大佬成碟粉都食晒仲等，个店员完全唔想同我催，一杯热奶茶使唔使整咁耐？隔多10分钟我再催一次，跟住个店员就行咗入去厨房拎住杯热奶茶出嚟，我怀疑系佢自己冲，其实明明好快就出到一杯热奶茶，点解要我等咁耐？好差嘅体验。仲要杯热奶茶系唔好饮，茶餐厅嚟讲算难饮。冇下次。