Food Garden ETC (已結業)

难得周末同先生一齐放假，决定过返个休闲嘅假期，第一步当然系食返个休闲嘅午餐，先生拣咗位于D2place嘅呢间西餐厅。餐厅嘅午餐选择虽然唔算多，但各款肉类选择都有，总拣到一款啱心意，而且价钱已经包餐汤、餐包同饮品，非常合理。是日餐汤味道有啲似甜薯汤，质地微稠，味道清甜。餐包烘到微脆，配上放软嘅牛油，味道唔错。牛肉汉堡配薯条份量唔细，厚切薯条新鲜即炸，又香又脆，内里系香软嘅薯蓉，非常滋味。牛肉汉堡尺寸虽然唔算大，但胜在够厚身，面包烤得够香脆，夹住烟肉、芝士、美国牛肉汉堡扒、蕃茄、酸瓜同西生菜，实在冇办法一啖咬哂所有材料，令人满足。美国牛肩肉有八安士，尺寸虽然唔算巨型，但够厚身，表皮煎得够香，无论配上自家制酱汁抑或岩盐都非常合适。先生拣咗五成熟，色泽粉嫩，而且冇血水，入口软嫩，牛香味重。鲜果冰茶冰凉爽口，配上新鲜柠檬味道清新。餐厅食物质素唔错，价钱合理，想喺周末忙里偷闲，逃离呢个石屎森林，绝对系一个好选择。