蟹膳 (已搬遷) 新店位置

假日嚟湾仔食饭，揾到静静嘅一角，门口仲有街边泊车位，好方便。 呢度私密度几高，大木门慢慢打开，先系接待处，望到两个大水缸，好多大大只嘅蟹，果然同个餐厅名一样，主打蟹！ 一坐低就见到啲餐具都系蟹嘅颜色，好高雅。同朋友都系蟹迷，无理由唔食蟹丫，叫左两个行政套餐。前菜系盐烧枝豆。 再嚟蟹肉蒸蛋，蛋蒸得好嫩滑，而蛋入面仲有好多蟹肉，用料十足。接住系啱啱炸起嘅松叶蟹天妇罗拼盘，店员温馨提示先食个流心蛋黄天妇罗，要一啖食㖞！ 原个放入口，蛋汁即时爆出，坚系正！ 蟹脚同蟹钳都系预先拆左壳，食得好方便，蘸少少绿茶盐，鲜味更突出。 但系最正，我最钟意嘅系大叶(紫苏叶)炸蟹肉饺，散发住阵阵幽香。跟住店员细心咁喺我哋面前煮野菜，汤底系昆布汤，煮完仲排得靓靓添。 食完天妇罗食返啲蔬菜，可以减少油腻感。毛蟹半只放汤轻煮，蟹壳已经剪开，只要挑出嚟就食到。 蟹肉唔系话好有鲜味𠮶种，但就好甜好甜，仲带一种特别嘅清香味道，正呀！稻庭乌冬都系店员帮手煮，服务真系100分。最后以甜品作结：姜味同咖啡味雪糕。环境舒适、服务一流、味道又好，绝对值得encore！