蟹膳 (已搬遷) 新店位置

假日嚟灣仔食飯，搵到靜靜嘅一角，門口仲有街邊泊車位，好方便。 呢度私密度幾高，大木門慢慢打開，先係接待處，望到兩個大水缸，好多大大隻嘅蟹，果然同個餐廳名一樣，主打蟹！ 一坐低就見到啲餐具都係蟹嘅顏色，好高雅。同朋友都係蟹迷，無理由唔食蟹丫，叫左兩個行政套餐。前菜係鹽燒枝豆。 再嚟蟹肉蒸蛋，蛋蒸得好嫩滑，而蛋入面仲有好多蟹肉，用料十足。接住係啱啱炸起嘅松葉蟹天婦羅拼盤，店員溫馨提示先食個流心蛋黃天婦羅，要一啖食喎！ 原個放入口，蛋汁即時爆出，堅係正！ 蟹腳同蟹鉗都係預先拆左殼，食得好方便，蘸少少綠茶鹽，鮮味更突出。 但係最正，我最鍾意嘅係大葉(紫蘇葉)炸蟹肉餃，散發住陣陣幽香。跟住店員細心咁喺我哋面前煮野菜，湯底係昆布湯，煮完仲排得靚靚添。 食完天婦羅食返啲蔬菜，可以減少油膩感。毛蟹半隻放湯輕煮，蟹殼已經剪開，只要挑出嚟就食到。 蟹肉唔係話好有鮮味嗰種，但就好甜好甜，仲帶一種特別嘅清香味道，正呀！稻庭烏冬都係店員幫手煮，服務真係100分。最後以甜品作結：薑味同咖啡味雪糕。環境舒適、服務一流、味道又好，絕對值得encore！