新泰東南亞餐廳 (太子集團中心) (已結業)

今日同朋友出到去尖沙咀食晚餐，知道尖咀有两间新泰今次就去咗北京道𠮶间。一入到去地方唔算大，灯光暗暗地，坐咗窗口位仲望到少少海景，都几好feel。朋友食过尖咀嘅另一间分店，佢都话呢一间个环境比较好，可能系平日嘅夜晚所以人都唔算多。我同朋友两个人就叫咗南瓜咖喱海鲜、印度薄饼、烧鳝、烧扇贝、两个椰青、芒果糯米饭。我本身唔算超级钟意食南瓜，但佢个咖喱配埋印度薄饼真系出色，非常香口浓郁嘅咖喱味由我口腔到爆发，认真唔错。烧鳝、烧扇贝都好好食，除咗我本身钟意食海鲜之外，佢嘅调味都几出色，系非常适合重口味嘅人，正正迎合左我，两样海鲜我同朋友都赞不绝口。作为泰菜嘅爱好者，一直觉得食泰菜系一定要配椰青，佢哋先系best friend。椰青非常清甜，一饮落后就觉得好幸福。最后我已经饱到上心口，但朋友都觉得要嗌返个甜品先系完美嘅终结，于是我哋就叫咗芒果糯米饭。好彩好彩，即使好饱都顶硬上，个芒果糯米饭真系劲好味，热辣辣嘅糯米饭仲冒紧烟，椰汁甜到适到好处，两者配合得天衣无缝，芒果味唔算好甜但都唔错，整体十分出色，简直系为今日嘅晚餐画上左个完美嘅句号。