程班長台灣美食 (已結業)

平时黎程班长都要排长龙，今次平日黎食好彩唔洗排队。系热情既店员招呼安排下就可坐低，然后先攞一个餐牌同红笔，写自己想点既菜，跟住去排队俾钱就可以等食啦！今次叫左红烧半筋半肉面（$55）、肉燥干拌面（$38）、炸花枝丸（$32）、小食综合盘（$28）、牛肉卷饼（$35）、蚵仔煎（$36）。太耐冇食台湾味，食到蚵仔煎同煎米血糕既时候真系好感动！先讲小食，炸花枝丸、小食综合盘同蚵仔煎都要等比较耐，因为都系新鲜炸起，真系会食唔停，米血糕同甜酱油好配，而蚵仔煎既甜甜酱汁软绵绵、滑口嘅感觉正正就系好多台湾食物既口感，强烈推介！主食方面，佢嘅红烧牛肉面系有少少辣但好惹味，佢既牛筋炆到好软好淋，面底煮到岩岩好，唔会太糊或者太硬，呢碗牛肉面只需要$55，性价比极高！必食！相比之下干拌面就较为普通。最后压轴要讲个人最期待既牛肉卷饼，同蛋饼既软外皮唔同，呢个卷饼外皮系酥脆既皮，而馅料系好足料嘅大块牛肉同青瓜，味道唔差但入口其实有啲干，下次试玉米起司蛋卷饼应该会湿润啲。听讲程班长今年三月就会暂停营业，钟意记得嚟支持下佢哋，如果钟意食佢哋嘅牛肉面仲有冷冻真空包可以买返屋企！