好燒味 (已結業)

利源東街附近向來都有唔少特色美食小店，而呢間有別於傳統燒味店裝潢嘅「好燒味」，店面細細，而且隱藏喺各式排檔側邊，好容易就會錯過咗。不過，佢哋所出品嘅燒味飯真係做得唔錯。先講飯盒外觀，用上紙盒，相對發泡膠盒，算係環保啲。淺藍色盒面印上自家店鋪Logo，整體設計簡約得嚟又帶Trendy感，有誠意。而且醬汁全部用密封盒仔另上，唔怕倒瀉，亦唔怕令到飯變「淋」。我今次叫嘅係三併飯　－　蜜汁叉燒、貴紀雞同埋燒腩仔。蜜汁叉燒：叉燒以瘦肉為主，只係帶少少脂肪。肉質腍身，甜味適中，而且好入味，唔錯。白切雞：雞皮好薄，只係有好少脂肪，連平時少食雞皮嘅我，都忍唔住雞肉連皮食。雞肉肉質算嫩滑，無雪味。脆皮燒腩仔：皮脆係基本嘅，而且肥瘦適中，食完唔會成口油或者感覺太油膩。另外，值得一讚嘅係燒汁。燒汁味道唔係一味「死咸」，反而味道較淡，又帶少少甜嘅味道，直接撈埋落啲飯喥，都已經好好味。