彩虹小食串燒專門店 (已搬遷) 新店位置

第五波疫情咁爆，有唔少食肆直情唔开，真系揾食艰难！因为响网上外卖平台落单，价钱唔特别标注。外卖大概半个钟送到，卖相唔错，食物仲热仲脆，味道唔错，整体感觉几好。初恋芝士撞棍（图上中）系响铃上面放芝士再炙烧，几正㖞！包皮包鸡包皮卷（图下右）系用鸡皮包住免治鸡肉及笋之类，唔系好脆皮，有少少失望。我觉得私伙鸡皮串 脆卜卜仲好食啲；而免治鸡肉软骨棒配日本宫崎蛋黄酱汁都好食过包皮卷。其他串烧叫左烧菠萝，几厚身，够Juicy；烧墨鱼丸弹牙，表面搽左酱汁几好味；烧鸡泡鱼干味道略甜，烧豆卜，烧翠玉瓜正正常常。椒盐类点了鸡软骨及香脆鸡中翼，鸡软骨算多，鸡翼有阵酥香牛油味，朋友觉得太腻，我就好钟意。叫左个牛油芝士焗娃娃菜，邪恶又好味，不过芝士响面层，底层既菜只系食到蒜香味，都好味。因为惊净食串烧唔够饱就叫左个厚切牛脷便当，四大块牛脷够腍，入口有少少溶化，如果酱汁多少少入味啲会更正！但原来啲芝士野同炸野都几饱肚关系，个饭只系食左面层有饭素捞果啲，实在有点浪费（饭既份量都几多）。建议大家如果想食串烧为主可以唔使叫饭，或者叫左饭就可以加一两串串烧当小食已经够。