夢樂園 (已結業)

一直都好想到访下猫Cafe，某日喺尖沙咀北京道经过见到梦乐园楼下嘅易拉架，于是乎就约咗爱猫之人一齐去寻梦一番。一开门就有猫猫好亲切咁迎接我哋。呢度总共有四只猫猫，可能佢哋都习惯咗见人，所以一啲都唔怕丑。呢度嘅餐牌全部都系猫猫嘅设计，暂停供应嘅菜式都系用猫猫贴纸遮住，真系好得意。店员送上食物之后，猫猫都忍唔住走过来想同我哋分享。我哋点咗风酥黑毛猪排骨配白饭，酥炸排骨肥膏唔多，虽然偏瘦但肉质仍然嫩滑，绝对值得一赞。家乡黑毛猪肉燥拌稻庭乌冬嘅酱汁收藏喺乌冬之下，将整份乌冬、肉燥同葱花一齐拌匀之后，就成为咗好美味嘅肉燥拌乌冬。 加$6就可以有一份小食，我哋就拣咗台湾肠，呢个价钱确系抵食。花枝丸够晒真材实料，将花枝丸切开一半炸，然后洒上点点椒盐，非常惹味。芋头沙奶茶有啲似一杯奶昔，入面有点冰沙，香芋味亦都够香。荔枝梳打味道清甜，夏天饮番杯真系透心凉。