肉肉強食 by 鋒膳 (已結業)

认识呢间舖头系因为有个Youtuber Data介绍佢平价吉列猪扒餐，只需要20蚊份，但每日限量30分。不过我今次去试嘅系佢嘅锯扒晚餐，因为见到佢价钱好吸引，啱晒我呢啲食肉兽。可能系平日去夜晚人流唔多，地方都算大，啲枱布好有特色(红白格仔枱布)，有旧式嘅港式豉油西餐格局!我几钟意啲枱都算几阔落， 坐得都ok舒服。睇睇餐牌， 肉类嘅价钱都非常之吸引。鸡牛猪羊鱼都有。我就拣咗个 沙丹猪扒;我老公就拣咗个西式牛柳 。如果你加22蚊就会有餐汤，面包，甜品， 饭/意粉/薯条 同嘢饮一杯。 服务员态度都几好， 估佢唔到唔使加一! 隔咗一阵我哋两份扒餐都好快上，我叫咗蒜蓉汁，但系原来我个沙丹猪扒上面仲有一堆蒜蓉， 好surprise, 因为如果要 蒜蓉粒 出面餐厅一般要另外加钱。个猪扒两大块仲有一只煎蛋，成份餐都好大份好扺食!猪扒食落几嫩口，唔会霉啄啄。而我先生个牛柳餐佢都话ok可以收货。饮埋汤，食埋甜品，饮埋杯热饮，成个肚饱到就嚟爆。两个人，人均都系一百蚊真， 真心扺食。 下次会再嚟试埋佢个杂扒餐😋