鳳城酒家 (已結業)

本身book左位，所以唔驶等。不过入坐冇几耐就见全院满坐，真系好期待。朋友大力推介既粟米鱼肚羹，果然真系唔错，唔会太稀似汤，又唔会太浓似芡汁。鱼肚十分爽口，而且份量够多，啖啖都有。跟手到虾多士，真系好香脆，食落唔油腻，虾味都算几够。钟意食香口野既朋友仔就岩哂口味，连汁都唔驶点呀。再黎就系乳猪拼生肠。睇左好几篇食评都见大获好评，谂都唔谂一定要试下啦。第一口系有点乳猪酱食既，其后都唔驶点，因为其实都几够味，有朋友可能会觉得咸tim。上汤炸粉果系另一个好多食评推介既，所以都有叫黎试下。第一次咁样食粉果，其实真系几好食，不过食一两只都几饱肚。而叉烧就有点偏瘦，肥番小小会好食d，不过都算软身，唔会似擦胶。几有惊喜既凤城炒饭，虾仁够哂爽口弹牙，蕃茄味好香，又解腻。