金城茶餐廳

营业中

休息中

而家做到7点钟，想食晚餐就要早啲啦，我同朋友慕名而来，咩都唔识，侍应好热心咁推荐孖宝(肉饼+猪扒)，推荐星米，仲有教我哋点加辣酱加辣菜脯食星米。我食嘅三样𩠌都偏咸，重口味，食完好口渴，建议淡口味者要慎重考虑。*生煎肉饼饭 $58煎到啱啱好，香脆又上色，厚身啖啖肉，肉饼本身好重肉感，唔会好多肥猪肉，咬落juicy有肉汁，肉味反而争少少，有马蹄粒同有少少甘味，陈皮甘味(?)，我都唔系好确定系唔系陈皮。一啖肉饼一啖饭，食晒肉饼仲可以落辣菜脯捞饭，菜脯好细粒，而且偏辣，我觉得菜脯捞饭size啱啱好。椒盐猪扒饭 $58食唔到椒盐味，反而似葱香猪扒饭，猪扒腌到好腍，冇左肉嘅质感同肉味🥲煎炸到熟度啱啱好，但好油，唔系juicy肉汁，系好油嘅汁，同我想像中嘅椒盐猪扒饭有出入。星洲炒米 $56哗，超级大碟，星米炒到干身，又唔会好油腻，冇啲假黄色米粉色，有虾仁叉烧青椒洋葱韮黄，标准嘅料头，每一啖好有层次感，超香超有味，加辣菜脯好食，加辣酱更好食，一啖接一啖停唔到口，系我食过最正嘅星米。