Ocio (積存街) (已結業)

星期日晏昼去咗大围食lunch，落大雨，餐厅位置唔近地铁站，要行一段路先揾到。因为未到食lunch时间，冇咩人，一入到去就可以坐低。餐厅装修唔错，但系空间唔算大，枱同枱之间嘅空位可以再阔啲。两个人坐左四人枱，所以都叫做舒适。两个人叫咗两个set lunch，叫咗烧汁牛柳粒烩意大利饭同龙虾汁炸软壳蟹烩意大利饭。每个set lunch包左一碗餐汤同一杯野饮，我哋叫咗cappuccino 同榛子咖啡。餐汤系洋葱汤，卖相麻麻地，睇到好油腻，味道上唔错，但因为油所以几腻。牛柳粒意大利饭卖相一般，好在好味，有唔少牛柳粒，食落好香蒜味，几惹味。龙虾汁软壳蟹意大利饭，味道冇牛柳粒意大利饭咁好，冇咁香口，但系都有惊喜，意大利饭好香龙虾汁味，软壳蟹虽然冇咩味，但炸到啱啱好，外皮脆内里软，热辣辣。饮品方面，两杯咖啡味道一般，不过不失，卖相可以再好啲。两个lunch嘅份量都够，食完好饱。服务态度良好，上菜速度快。整体来讲，人均消费$68，喺假日食lunch算系性价比高。去开大围可以一试。