萬利小食店

营业中

休息中

同大埔嘅人講起萬利呢間小店未必個個人都會知，但講起大埔中心馬會投注站隔籬間車仔麵就個個人都會知，畢竟呢間小食店陪伴咗唔少大埔友嘅成長。今日難得行去馬會就順便再幫襯，畢竟都好耐冇食過，小店主打車仔麵同小食，兩餸車仔麵都係 $29 價錢算幾吸引。車仔麵叫咗豬紅、豬腸同蘿蔔，呢度嘅豬紅味道好正又夠香，而豬腸亦處理得唔錯，洗得乾淨又夠咬口，唯一美中不足嘅係啲蘿蔔雖然好淋而且冇渣，但可惜唔夠入味，另外一定要加埋小店自家嘅辣醬，辣醬味道香濃辣度適中，將成個車仔麵再進一步昇華。