象月-泰式休閒餐廳 (已結業)

好耐冇黎大埔区，见完朋友之后周围揾嘢食，先发现大埔旧墟原来有一条食街，两旁都有好多唔同嘅小店，最后拣咗呢间好似新开嘅泰式餐厅。先来个生虾刺身，虽然得六只，但每只虾都几大只，啲虾好新鲜及弹牙。冬阴公汤味道唔算辣，酸味同辣味个比例都几好，有成三只虾，另外都有好多唔同配料，令到汤嘅层次感更加丰富。飞天通菜其实系辣椒炒菜，越食越会觉得辣，食唔到辣嘅唔好点呢个菜。炸虾饼系我最钟意食嘅泰菜之一，虾胶打得唔错好弹牙，炸得亦都非常好。泰式串烧，猪肉弹牙有咬口，鸡肉十分之嫩滑，牛肉味道都唔错，不过𠮶酱好似唔系串烧花生酱，如果唔系会更加好食。最后叫咗个咖喱炒蟹，只蟹好大只好足料，亦都好肥有多膏，个黄咖喱炒得几香，食完晒蟹先至发现仲有好多咖喱汁，再叫咗个薄饼加埋咖喱汁食就一流啦。可能系新餐厅嘅推广，只系社交媒体Like 就会送甜品啦，可能系送嘅甜品不过不失。