牛蓋 (已搬遷) 新店位置

牛盖饭总系有种魔力，净系见到一片片牛肉已经流哂口水，立刻影完相就要食！坊间嘅牛盖饭唔算平，难得屯门哩间小店价钱合理，绝对要嚟试吓。店舖好细，大概十几个位，座位较逼，晚饭时间嚟都要等一阵。哩到系自助形式，落单，拎餐具同食物都系自己嚟。牛系目标，所以叫左牛扒盖饭同极上牛盖饭，仲要埋220g添！牛扒盖饭系入门版，价格完全可以接受。大碗份量足，大食嘅一定会饱。牛肉一片片好薄，配上烧汁味道系不错嘅！不过，略嫌有d韧。饭就较为失望，唔系用珍珠米，但价格平，唔可以要求太多。而米饭整得过湿，欠缺口感。极上盖饭嘅牛脂肪较多，一入口，虽然未及和牛咁入口即溶，但肉质好嫩滑，而且满囗充分牛肉油脂，质素比牛扒盖饭更高一级。加上一只滑蛋，令盖饭升华。蛋汁滑滑地，配牛肉同饭都好夹。相反，牛扒盖饭就较为单调。如果特登嚟食，会推介细碗嘅极上牛盖饭，价钱合理，牛肉高质。