濰京坊

营业中

休息中

虽然帮衬过潍京坊好多次，不过猴子见识少，到家阵都唔知呢个咁特别嘅舖头名系乜嘢意思，有冇人可以指教吓猴子？今餐叫咗个三鲜炒面，贪佢够香够惹味。猴子今日唔太肚饿，而呢碟三鲜炒面又份量十足，所以未食都已经知道今次做硬大嘥鬼。讲返味道，粗面食落系好弹牙，而且炒得好香。至于「三鲜」，就系虾、鸡肉同猪肉，虾就细只咗啲，好似虾米咁上下大细，猪肉系半肥瘦，香滑兼备，而鸡肉就实咗少少，味道又浓咗啲。至于饮品嘅豆浆亦好鲜滑，记得有次有个客人就系因为啲豆浆啱啱卖晒饮唔到而发店员脾气，可见呢度啲豆浆几受欢迎。三鲜炒面本身卖HK$53，跟餐豆浆要加HK$9。整体嚟讲系几好味，不过油腻味浓嘅菜式其实好易饱肚，猴子建议份量可以少啲，然后卖平一、两蚊，咁就一家便宜两家著。