呂仔記 (已結業)

工作关系入左筲箕湾一转，至四点终于走得，未食午餐少少饿，但七点又约左人食晚饭，打电话同住附近的朋友求救，问有咩好食！咁佢都系指我去东大街，因为就快又食饭，佢建议我扫下街就算！本来拣鸡蛋仔，点知去到休息，咁最后就去左食吕仔记了～吕仔记主要系卖小食同糖水，即系鱼蛋烧卖粉果鱼肉生菜碗仔翅o个d，糖水就系中式的，即系芝麻糊o个种！咁我要左 鱼肉烧卖 ($26/8粒)等左一阵就见到姐姐拎俾我啦！用纸盛著的烧卖粒粒都有成吋咁大粒，以金黄的烧卖皮包著，淋上酱油～食左第一啖就知同其他的烧卖的分别，质感好实净，食得出入面系好多好多鱼肉，没有一般的粉感，估计每粒有八成以上是鱼肉，有鱼鲜味，味道真系唔错！不过八粒真系有点饱，后来先知可以叫半份（即四粒）！呜呜！等待期间，望到墙上残旧退色的剪报，原来烧卖是老板用每天买来的大黄鳝起肉制成，难怪口感同味道都同街外的不一样。平时食开沟左粉的烧卖，虽然系平，但都无咩味，呢度每口都食到真材实料，成件事变得值得一试。