一糖 (屏山)

营业中

休息中

呢日同人去到天水围，试试呢间几出名嘅一糖。门面好日系嘅感觉，入面就简简单单。甜品款式几多，由新派到传统都有。另外仲有唔少饮品，睇落都几吸引。餐牌写呢杯白桃活乳酸梳打系新出嘅，杯入面预先放咗白桃汁同冰块，梳打水同活乳酸就另外分开两樽。先慢慢倒梳打水，再加埋活乳酸，份量可以因应自己喜好而加减。白桃配活乳酸，以为会好酸，估唔到又几平衡。芒果冰嘅沙冰幼细，饮落透心凉。焦糖炖蛋用士多啤梨装饰，卖相唔错。面层焦糖唔厚唔薄，微甜同有少少微温，下层炖蛋滑溜冰冻，表现唔错。黑芝麻心太软伴芒果雪糕入面啲伴碟嘅鲜杂果份量唔少，睇落几丰富。将心太软切开，中间嘅黑芝麻慢慢流出，流心度令人满意。生磨芝麻窝夫伴曲奇雪糕，呢个系另一款新品嚟。窝夫质感外脆内软，唔会太干又唔会太腍，黑芝麻味又够香浓。其中两块上面仲有烧棉花糖，令佢多咗份香甜口感，几啱我口味。