住家菜

营业中

休息中

又够钟做孤独的美食家，收工自己买外卖，话说之前系另一间食过两𩠌饭质素比较差，今次就揾到呢间未食过试试，原来呢间住家菜都开左好几年，平时行开新北江都唔多觉以为开左无耐，都未帮衬过，今日就试下啦。大约晚上7点到人唔算话好多，睇返价钱其实都唔算平，两𩠌饭都要41蚊无野饮，3𩠌更要60蚊，𩠌既选择大约十几左右，卖相睇落都几靓，成个买饭过程超光速，唔洗唔洗20秒搞掂，所以就算人多排队都好快清龙，阿姐既态度都尚算ok啦。拣左两𩠌要左莲藕煎肉饼同炆猪手，个量呢，就真系几多下，莲藕肉饼有3块，猪手有5大件，饭都唔少。先讲个饭就算正常，唔会好湿好笠，少少黏，饭香味都有d，ok既，猪手炆得都够腍，腍得黎唔会好烂，都好入味，而且都算干净同无怪味，莲藕肉饼就夸张，好厚身，猪肉比例比较多唔会好粉，莲藕粒就偏少d，咬落入面竟然仲有d肉汁唔会好干，面头仲有d泰式辣酱增加风味。虽然话41蚊食个两𩠌饭未去到话好平，但𩠌菜同饭量真系几多，我系饿到就晕既状态下都勉强剩左1块肉饼同1件猪手（无浪费留左第日食），而质素都唔差，细食既朋友可能1盒够2个人食tim，有时唔知食乜既时候呢间两𩠌饭店都系几好既选择。