斗斗滋味小廚 (嘉悅) (已結業)

住系呢附近，咁啱去惠康买嘢嘅时候就见到呢间餐厅有送乳鸽同醉鲍鱼嘅活动，返屋企即刻同家人讲，星期五就攞黎试下啦。 我哋一家四口，送咗两只醉鲍鱼同一只乳鸽，都要赞下只乳鸽，皮非常香脆且不油腻，仲系新鲜出炉热辣辣嘅，超级好味，我哋食完又自己嗌多咗一碟。 醉鲍鱼我自己就麻麻哋（因为我唔钟意饮酒），但系我爸就话鲍鱼肉质爽口弹牙，酒味同鲍鱼味嘅结合都相当唔错。 终于到重点主角啦，呢个「金汤酸菜鲈鱼」，我系一个特别钟意食川菜嘅人，香港几乎所有川菜馆我都有去过，本身抱住试下嘅心态嗌咗呢盘酸菜鱼，点知竟然有惊喜。 首先个汤头已经好浓郁，加埋爽脆嘅酸菜，仲有土豆粉系下面，净系饮碗汤食啲配菜都觉得饱。雪白嘅鱼肉柔嫩鲜美，俾酸汤浸到入味，一口鱼肉一啖汤，唇齿留香 最后一碟就系呢个「醉鹅肝」啦，本身佢攞上来嘅时候，我仲觉得有小小食唔落口…卖相不及前几道菜咁精致。但系唔食又嘥，惟有试下咯。点知竟然好食到我食晒整盘，我前面都提过我唔钟意饮酒，但系呢个醉鹅肝绝对打破咗我嘅界线，虽然去卖相麻麻哋，但系「人不可貌相」，醉鹅肝嘅口感极为丰富，甜味香醇嘅酒配埋肥美醇厚嘅鹅肝，系前所未有嘅味觉体验。整体甜味居多