屯の大阪章魚燒 (已結業)

屯の大阪章鱼烧最初开嘅时候真系好好生意，听讲排队排好耐，虽然我都系新界区人，但都唔系话好想衬墟，所以我到好后期先第一次食。到而家好多地方好似葵广啊，都已经有得食章鱼烧，而且听闻评价都唔错，所以热潮都稍稍退落黎一点。我第一次黎食嘅时候，佢地已经换成左细版，价钱唔系太贵，又食到类似喺日本大阪食到嘅口味，所以我同朋友都几钟意。反而我自己唔系太钟意实的的嘅港式章鱼烧。佢地有原味、葱、明太子、同蟹籽，最深刻印象系葱，因为我一向唔太钟意食青葱，但都觉得好香口好好食，可惜之后黎左两次都冇哂。近期呢次食，已经系9月份嘅事，佢地又再次变番做大粒版嘅章鱼烧，呢啲大、细问题，纯粹个人喜好，都明白好难满足哂所有人嘅口味。有啲人觉得大粒啲，食落满足啲，我自己就钟意细粒啲，始终章鱼烧热辣辣，太大粒好难一野放入口。大粒版嘅章鱼烧，只系多粉左，里面依然系一粒章鱼，咁只系食多左粉啫。可能因为我地一开门就去，葱未预备好，拣左明太子同激多蟹籽两款，感觉大版价钱都有调高左点。明太子口味比较咸香，章鱼烧粉多，章鱼唔算好大粒，但新鲜热辣，都唔会差得去边。激多蟹籽系名符其实，真系份量激多，其实几抵食，去超市买细细盒蟹籽都十几蚊啦。