源記餐廳 (已結業)

以食店嘅占地面积嚟计，呢间源记餐厅喺呢区都算数一数二，猴子唔系好识计面积，不过粗略嚟睇都好似有千几呎，坐百几人都应该冇问题。（都系𠮶句，有错请留言指正）不过最令猴子惊讶嘅唔系间舖有几大，而系佢嘅抵食程度。今朝猴子叫咗个至醒早餐，有肠仔、煎蛋、牛油方包、热饮，再加埋一碗大大嘅猪软骨汤面，埋单找数只系HK$32，抵唔抵？仲未算，由于今日系假日，所以佢哋多收HK$2，即系话平日嚟帮衬只系需要HK$30！讲到味道，煎蛋有蛋味，肠仔有肠仔味，牛油方包软绵绵，猪软骨嘅酱汁有啲似甜酸酱。总括嚟讲，以呢个价钱嚟计就应该冇乜投诉。