利小館 (已結業)

同人去利小馆,叫咗几样嘢.花雕醉鸡以价钱嚟讲个份量比较少,好彩当日系鸡髀位,肉质比较多同嫩滑,味道就带酒香唔涩.陈醋云耳入面加咗百合,青瓜,红椒,酸香爽脆,都几开胃.XO酱煎萝卜糕,萝卜糕切成骰仔大小,不过XO酱味唔浓,糕身亦比较湿润松散.鲜虾意式白汁意粉,粗身嘅意大利粉表面蘸满白汁,当中有虾肉,青红椒等.奶味浓郁.有啲西式嘅感觉.蜜汁火方,金华火腿表面蘸咗稠身嘅蜜汁,夹晌包子之间嚟食,既甜又中和咗金华火腿嘅腻感.四喜烤麸,烤麸吸满酱汁,都几香甜,云耳同花生就令成碟嘢更有咬口.香槟汁海鲜焗饭,铺咗厚厚芝士同酱汁焗成,下面嘅饭粒粒分明,同埋加咗啲海鲜,对芝士控嚟讲都几满足.