Orange Elephant Thai Restaurant (博文街) (已搬遷) 新店位置

又嚟到大角咀，之前见过呢间餐厅，见佢有每日一款𩠌菜只需要1蚊鸡，觉得好吸引好有兴趣，今日咁啱有机会就一于试下佢坚唔坚。去到大概8点钟左右，见到门口外面有个牌写住9PM后入座7折，但仲有成粒钟先够9PM，而且已经有1蚊一个𩠌。内面唔算太多人，仲有位，唔驶等，佢D枱坐位都几阔落，个梳化位仲有D泰国特色嘅咕臣。点菜，必点当日一蚊鸡有一个酸辣无骨凤爪，跟住老婆想食软壳蟹，再加个主食金边粉。菜牌上话有WIFI，实际问佢又话无。张枱都几阔落。先上酸辣凤爪，凤爪酸辣味恰到好处，配菜沾上酱汁亦能配合其酸辣的味道。作为凉拌前菜，非常有水准，并且以一蚊鸡的价钱，性价比极高。第二个上的菜是香蒜软壳蟹，外表睇落都尚算合格，但明显不够酥脆。软壳蟹较细只，入口亦真的炸得不够脆，大概有5-6块半只软壳蟹，算比较足量，旁边的炸蒜很香口。整体比较失色，不够干身酥脆，但口味尚算不错。最后叫了一个主食，泰式虾球金边粉，都几大碟，虾球？唔系虾仁咩？话唔定"泰式虾球"等于虾仁。个粉比较软身，可能我加多咗青柠汁，感觉成碟粉口味偏酸。埋单两个人人均都唔驶100。几抵食。下次可以再试下，好像星期三是一蚊鸡嘅菜式是价值160+嘅乌头。