Apinara

营业中

休息中

Apinara餐厅室内设计以热带花卉图案同装修为主，营造出令人心旷神怡嘅用餐环境。采用手机点餐服务，方便又快捷。食物可以拣辣/唔辣；饮品仲可以拣甜度同埋少冰/走冰，好贴心。中午时份更有丰富午市套餐，包括汤、沙律、主菜、甜品同饮品，价钱只系由$188起，喺太古广场入面嚟讲都非常合理。我好钟意食佢哋嘅「泰式鸡肉炒金边粉」顺滑又带些烟靭嘅河粉，配以炒蛋、豆芽菜、豆干丝同碎萝卜干，再加上鲜美嘅鸡肉，旁边仲有花生粒、砂糖同辣椒粉。每一啖都散发出酸甜微辣，真系「泰」滋味。「烧猪颈肉配白饭」系另一款令人食指大动嘅菜式。嫩滑嘅猪颈肉经过特殊嘅腌制同烤煮，保持了肉质嘅鲜嫩同丰富嘅口感；香气四溢嘅泰国茉莉米同清爽嘅配菜，味道搭配和谐。「冬荫功」汤底以辣椒、柠檬叶同香茅为基础，加入鲜虾同草菇，酸辣开胃。「泰式椰汁鸡汤」带有淡淡嘅椰子香气，滋味顺喉。鸡肉、香茅同其他香料熬制出一碗层次感满满嘅浓汤，令人会一饮就唔想停落嚟。「精选沙律」系麻酱鸡丝金菇沙律。鸡丝份量颇多，沙律菜新鲜，金菇倍添咬口。「泰式炒通菜」简单却美味。通菜经过快速翻炒，保持蔬菜本身嘅脆爽，混入丰富调味料，非常惹味。「精选甜品」香芋红豆椰汁糖水。