皇室冰廳 (已結業)

今晚去开长沙湾附近，见到呢间皇室冰厅就入去试下，本身谂住应该系一般茶餐厅嘅质素，点知食落发现有惊喜真。番茄浓汤特餐，餐牌写住镇店特餐咁厉害，所以一定要试一试佢，跟餐嘅无味精老火例汤，好足料：有椰子、红萝卜、瘦肉，饮落有好浓郁嘅鲜味，应该煲咗好耐，正！个番茄浓汤乌冬因为系用新鲜蕃茄每日新鲜制造，味道果然好浓郁，乌冬亦都弹牙牛乳炒滑蛋亦都好香蛋味，而最值得介绍嘅绝对系佢𠮶块即叫即炸嘅吉列猪扒。外皮薄薄嘅一层粉浆香脆松化，包裹住入面非常松化嘅厚切猪扒，我仲食得出猪扒好似有好香嘅豉油味，真系会食上瘾！酱爆茄子脆鱼柳煲，非常够镬气，一拎上台已经闻到香味。整个煲味道浓郁，茄子腍滑，鱼柳亦十分鲜嫩入味，同埋鱼柳分量好多，配埋白饭一齐食简直一绝！椰汁凉粉冰，淡淡嘅椰香加上凉粉，解渴得嚟又好味估唔到咁平民化嘅价钱都可以食到咁好味嘅食物，绝对物超所值，一定会返嚟试埋其他餐！