田記魚蛋牛腩專門店 (塘尾道)

营业中

休息中

太子塘尾道一带唔算好旺，夜晚嘅时候唔系特别好多餐厅，但系见到呢间特别灯火通明，就吸引咗我喺寒冷嘅天气入去食个热辣辣嘅汤面。✨环境✨坐得比平时嘅汤面舖头舒服，入边亦都好光猛同埋干净，最贴心嘅系每张枱侧边都有一盒盒纸巾。✨食物✨🍜牛三宝粗面加紫菜 ($51+7)叫咗个牛三粗，包含左牛腩、牛筋、牛柏叶，另外用$7加咗个紫菜。呢个牛三粗话系我食过最好食嘅牛三粗绝对唔过分，个汤好重牛味，而啲牛腩同埋牛柏叶都炆得好冧，牛筋亦都系入口即溶嘅感觉。🍜鱼三宝幼面 （$37）鱼三宝幼面就有鱼片、鱼蛋、鱼皮饺，呢个幼面清清地，系暖胃嘅不二之选。另外仲叫咗个芥兰同埋加咗两杯嘢饮，分别系热柠宾同埋热好立克。个菜份量好足料，而两杯嘢饮都系好足料，柠檬佢绝对冇比少，同埋系我饮过最足料嘅好立克。特别值得一提系每张枱都提供好多唔同嘅酱料，有一个系麻辣辣椒油，加落啲汤面度，真系非常之野味，如果食得辣嘅人，一定会推荐佢哋试吓呢个辣椒油。呢间小店貌似平平无奇，但系比到我惊喜，如果外国游客黎叫我带去食啲地道嘅面食，呢间会系我首选。