紅番茄餐廳 (已結業)

今晚去到太子搵食，呢度都好多選擇，不過其中一間有大大個蕃茄係門口，於是就入去睇下。本身諗住係用蕃茄做主題，原來餐廳入面係唔係主打蕃茄。 晚市就主打套餐。 蒜蓉包，非常香脆，除左味道夠香，蒜味突出之外，咬落去口感好正，脆既程度同薯片有得比！配埋忌廉湯食，湯不過不失。 海鮮黑松露意大利飯，都幾多海鮮，有青口，帶子，蝦同蜆。飯就少少偏淋，黑松露味道唔會太搶，但就夠creamy。帶子外層金黃色，食落爽口。蝦已經脫左穀，所以完全唔駛自落手，抵讚！ 紅番茄德國鹹豬手配黑椒汁，先講主角豬手，夾起豬手會見到各部份分佈，皮夠晒脆，肉夠淋，脂肪位唔難食。配菜既薯皇十分出色，夠新鮮，小心入口會燙口，入口外脆內軟。同時又配上脆肉瓜，都幾多野食。 牛奶布丁，跟餐可以加$3就有，絕對抵食，因為全部用細樽獨立裝住，除左外觀，味道都拍得住milk too，夠晒滑又有奶味。食完之後我相信門外既蕃茄應該唔係代表佢係食蕃茄既專門店，不過野食味道就真係唔錯。